Mmoa ho adesrɛ
Dawid nnweneho dwom. Mpaeɛ a ɔwɔ ɔbodan mu no, ɔbɔeɛ.
1 Mede me nne mesu mefrɛ AWURADE,
mede me nne mekoto mesrɛ AWURADE,
2 mehwie m’abooboo megu n’anim,
meka m’ahohia mekyerɛ no.
3 Me honhom tɔ piti me mu a,
wo na wonim me kwan.
Ɛkwan a menam soɔ no so
na wɔsum me fidie.
4 Mehwɛ nifa, na hwɛ,
obi nni hɔ a n’ani ku me ho,
dwanekɔbea abɔ me,
obiara mfa me kra nyɛ huu.
5 Mesu mefrɛ wo, AWURADE.
Mese: Wone me dwanekɔbea,
me kyɛfa, ateasefoɔ asase so.
6 Wɛn w’aso tie me su,
na mayɛ hodwoo,
yi me firi m’ataafoɔ nsam,
na wɔn ho yɛ den kyɛne me.
7 Yi me kra firi afiase,
na mayi wo din ayɛ.
Ateneneefoɔ bɛtwa me ho ahyia
sɛ wo ne me adi no yie.